ՀՀ ԳԱԱ ԳԿՄԿ ուսանողները հյուրընկալվեցին ՀՀ ԱԺ-ում
Դեկտեմբերի 22, 2025
2025 թ․ դեկտեմբերի 19-ին ՀՀ ԳԱԱ գիտակրթական միջազգային կենտրոնի (ԳԿՄԿ) մի խումբ ուսանողներ, հիմնականում՝ իրավագիտության մագիստրանտներ, հյուրընկալվեցին ՀՀ Ազգային ժողովում։
Այցի նախաձեռնությունը ԳԿՄԿ դեկան Ատոմ Մխիթարյանինն էր, ինչն իրականացվեց ԳԿՄԿ հանրային կապերի և կարիերայի բաժնի միջնորդությամբ։ ԳԿՄԿ դեկան Ատոմ Մխիթարյանը, ԳԿՄԿ հանրային կապերի և կարիերայի բաժնի պետ Հեղինե Մելքոնյանը ևս ընդգրկված էին այցելող խմբում։
Այցի շրջանականերում խումբը հնարավորություն ունեցավ ծանոթանալու ԱԺ-ի շենքի ճարտարապետության պատմությանը, գրադարանին, թանգարանին, միջանցքային ցուցադրություններին՝ պատմական արժեք ներկայացնող, ինչպես նաև՝ տեսնելու նիստերի դահլիճը։
ԳԿՄԿ խմբի հիմնական կանգառը ԱԺ պետաիրավական հանձնաժողովն էր, որտեղ կայացավ հանդիպում-քննարկում հանձնաժողովի փոխնախագահ Արուսյակ Ջուլհակյանի հետ։ Քննարկման առանցքում «ՀՀ ընտրական օրենսգիրք»-ն էր, մասնավորապես՝ ԱԺ-ի ընտրության կարգը։ Ա․ Ջուլհակյանը մեծ պատրաստակամությամբ ներկայացրեց հարցին առնչվող հիմնական օրենսդրական կարգավորումները, ապա պատասխանեց ԳԿՄԿ մագիստրանտների և աշխատակիցների բոլոր հարցերին։
ԱԺ շրջայցը շատ արդյունավետ էր․ այն ապահովեց ոչ միայն օրենսդրական գիտելիքների ամրապնդում, այլև անմոռանալի զգացողություններ՝ իր կարևորությամբ և ճարտարապետական վեհությամբ առանձնացող շինության պատերից փոխանցված։
ԳԿՄԿ այցելող խումբը իր երախտագիտությունն է հայտնում ԱԺ-ի ղեկավարությանը և շրջայցը կազմակերպած աշխատակիցներին՝ նման հնարավորության և հարուստ տեղեկատվությամբ շրջայցի համար։
Կից լուսանկարների մի մասը՝ տրամադրված ԱԺ-ից։
ՀՀ ԳԱԱ ԳԿՄԿ հանրային կապերի և կարիերայի բաժին
