ԳԿՄԿ աշխատակից Մ․ Սարգսյանը Erasmus+ դասախոսություններ է կարդացել Մադրիդի Կոմպլուտենսե համալսարանում
Մայիսի 5, 2025
ՀՀ ԳԱԱ ԳԿՄԿ գիտական քարտուղար, լեզվաբանության ամբիոնի վարիչ, բ․գ․թ․, դոցենտ Մերի Սարգսյանը, հրավիրված լինելով ընդունող համալսարանից, 2025 թվականի ապրիլի 20-ից Մադրիդի Կոմպլուտենսե համալսարանում ներկայացրել է հայերենագիտական 5-օրյա դասախոսությունների շարք։ Գործուղումն իրականացվել է Erasmus+ միջազգային կրեդիտային շարժունության ծրագրի շրջանակներում։
Դասախոսությունների թեմաներն են եղել՝
- ՀՀ ԳԱԱ գիտակրթական միջազգային կենտրոնի լեզվաբանության ամբիոնը. հետազոտական և կրթական ուղղությունները,
- Հայերենը՝ հնդեվրոպական լեզվաընտանիքի ինքնուրույն ճյուղ,
- Հայոց լեզվի զարգացումը. պատմական փուլերը,
- Հայոց այբուբենի ընդհանուր բնութագիը,
- Հայ գրերի տեսակները,
- Հայերենի հնչյունաբանության յուրացում. գործնական դաս,
- Հայերենի քերականության բացահայտում. գործնական դաս,
- Հայերենի հիմնական բառապաշարը. գործնական դաս։
Կոմպլուտենսե համալսարանի Հայագիտական հատուկ ամբիոնի վարիչ, պրոֆեսոր Ֆրանցիսկո Էրնանդեզ Զուրյանի հրավերով՝ Մ. Սարգսյանն այցելել է համալսարանական մի քանի ֆակուլտետ, դասախոսություններ կարդացել, ներկայացրել ՀՀ ԳԱԱ գիտակրթական միջազգային կենտրոնի լեզվաբանության ամբիոնը, հետազոտական և կրթական ուղղությունները:
Մ․ Սարգսյանը հյուրընկալվել է նաև Կոմպլուտենսե համալսարանի Աշխարհագրության և պատմության ֆակուլտետում, որտեղ և տեղակայված է Հայագիտական հատուկ ամբիոնը: Տեղում ծանոթանալով Կոմպլուտենսե համալսարանի Հայագիտական հատուկ ամբիոնի ակադեմիական և հետազոտական գործունեությանը՝ հաստատվել են համագործակցային կարևոր կապեր: Ֆակուլտետի դեկան Միգել Լուկե Տալավանի հետ քննարկել են գործուղման ընթացքը և հետագա համագործակցության հնարավորությունները:
Աշխատանքային հանդիպում է եղել նաև Erasmus+ միջազգային կրեդիտային շարժունության ծրագրի համակարգող, UCM արտաքին կապերի գրասենյակի աշխատակից Սոնյա Գորրիզի հետ․ քննարկվել են ՀՀ ԳԱԱ ԳԿՄԿ մագիստրանտների և ասպիրանտների շարժունության և կրթական ծրագրերի համապատասխանության առանձնահատկությունները:
Հանդիպումները բավական արդյունավետ են եղել՝ դառնալով երկարաժամկետ ու արդյունավետ համագործակցության սկիզբ: Քննարկվել են համագործակցության հնարավորություններն ու խնդիրները թե՛ կրթական, թե՛ հետազոտական ծրագրերով: Պայմանավորվածություն է ձեռք բերվել շարունակելու համագործակցությունը ոչ միայն կրթական ծրագրերի, այլև հետազոտական համատեղ աշխատանքների ուղղությամբ:
ՀՀ ԳԱԱ ԳԿՄԿ հանրային կապերի և կարիերայի բաժին
