Էրազմուս+ տեղեկատվական օր ԳԿՄԿ-ում

Ս.թ. հոկտեմբերի 14-ին ՀՀ ԳԱԱ գիտակրթական միջազգային կենտրոնի արտաքին կապերի բաժնի նախաձեռնությամբ Erasmus Days միջոցառման շրջանակներում կազմակերպվեց Էրազմուս+ միջազգային կրեդիտային շարժունության ծրագրերին նվիրված տեղեկատվական հանդիպում` նախատեսված «Գործարար վարչարարություն» և «Իրավագիտություն» մասնագիտությամբ սովորող 1-ին կուրսի ուսանողների համար:

Հանդիպման ընթացքում ՀՀ ԳԱԱ ԳԿՄԿ արտաքին կապերի բաժնի պետ Արուսյակ Հարությունյանը ծանոթացրեց Էրազմուս+ միջազգային կրեդիտային շարժունության ծրագրերի հնարավորություններին, իսկ բաժնի գլխավոր մասնագետ Էլլա Պապիկյանն էլ իր հերթին ներկայացրեց Իտալիայի Տուշայի համալսարանում ուսանելու նպատակով ծրագրին դիմելու ժամկետներն ու պայմանները: Է. Պապիկյան մանրամասն ներկայացրեց նաև Իտալիայի Վիտերբո քաղաքի առանձնահատկություններն ու կեցության պայմանները, Տուշայի համալսարանի կրթական ծրագիրը և հորդորեց ուսանողներին բաց չթողնել 2022-2023 ուստարվա երկրորդ կիսամյակում Իտալիայում ուսանելու հնարավորությունը:

Հանդիպման վերջում ուսանողները հնարավորություն ունեցան հղել իրենց հետաքրքրող հարցերը «Էրազմուս+» միջազգային կրեդիտային շարժունության ծրագրերին դիմելու ընթացակարգի և պայմանների վերաբերյալ:

Հիշեցնենք, որ Էրազմուս+ միջազգային կրեդիտային շարժունության ծրագրի շրջանակներում ՀՀ ԳԱԱ գիտակրթական միջազգային կենտրոնի «Գործարար վարչարարություն» և «Իրավագիտություն» մասնագիտությունների առաջին կուրսի ուսանողները կարող են 2022-2023 ուստարվա երկրորդ կիսամյակը ուսանել Իտալիայի Տուշայի համալսարանում:

Մասնակցության համար անհրաժեշտ է՝

• լինել ՀՀ ԳԱԱ ԳԿՄԿ «Իրավագիտություն» կամ «Գործարար վարչարարություն» մասնագիտությունների առաջին կուրսի ուսանող /առկա/,
• ներկայացնել ինքնակենսագրություն անգլերեն լեզվով (պարտադիր Europass ձևաչափով),
• տիրապետել անգլերեն լեզվին՝ Լեզուների Եվրոպական շրջանակի B2 մակարդակին համապատասխան,
• «Գործարար վարչարարություն» ուսանողների համար նաև իտալերեն լեզվի B1 մակարդակի իմացությունը պարտադիր է:

Մրցույթի առաջին փուլին մասնակցելու համար անհրաժեշտ է մինչև ս/թ նոյեմբերի 1-ը ներառյալ՝ ella.papikyan@isec.am և arusyak.harutyunyan@isec.am էլեկտրոնային հասցեներին ուղարկել հետևյալ փաստաթղթերը /որպես մեկ pdf փաստաթուղթ/ ՝

• մոտիվացիոն նամակ անգլերեն լեզվով, թե ինչու եք ցանկանաում ուսանել Տուշայի համալսարանում,
• ինքնակենսագրություն անգլերեն լեզվով ( Europass ձևաչափով),
• անգլերեն լեզվի հավաստագիր (առկայության դեպքում),
• անձնագրի պատճեն:

Ուսուցման լեզուներն են՝

«Իրավագիտություն» մասնագիտության դասընթացներն իրականացվում են անգլերեն լեզվով:

«Գործարար վարչարարություն» մասնագիտության դասընթացներն իրականացվում են իտալերեն լեզվով:

Ուսուցողական և օժանդակ նյութերը բոլոր ուսանողներին տրամադրվում են անգլերեն լեզվով:

Փաստաթղթային փուլը հաղթահարած մասնակիցների հետ կանցկացվի բանավոր հարցազրույց անգլերեն լեզվով:

Գնահատման չափանիշներն են՝

• Միջանկյալ քննությունների արդյունքները:
• Լեզվի իմացությունը (անգլերեն):
• «Գործարար վարչարարություն» մասնագիտության ուսանողների համար՝ նաև իտալերեն լեզվի իմացությունը:
• Բակալավրի ՄՈԳ-ը:

Ուսանողին կտրամադրվի ամսական 850 եվրո կրթաթոշակ և 360 եվրո գումար` ճանապարհածախսը հոգալու համար:

Իտալիայի Տուշայի համալսարանի վեբկայքն է՝ http://www.unitus.it/

ՀՀ ԳԱԱ ԳԿՄԿ հանրային կապերի և կարիերայի բաժին